12/02/2026.- NOVAS MUNICIPAIS     

O Concello de Pontecesures celebrará o vindeiro domingo 22 de marzo a I Feira de Segunda Man e do Comercio Local, coincidindo coa festividade de San Lázaro, unha das citas máis arraigadas e emblemáticas do municipio.

Esta iniciativa enmárcase dentro da política municipal de compromiso co medio ambiente e coa economía circular, co obxectivo de promover hábitos de consumo responsables e sostibles entre a veciñanza. A través desta feira, o Concello busca crear un espazo aberto e participativo no que tanto a cidadanía como aquelas persoas interesadas poidan ofrecer produtos usados en bo estado que xa non empregan habitualmente, tales como roupa, artigos deportivos, produtos de puericultura, obxectos de decoración, libros, complementos e outros bens susceptibles de reutilización.

O fin principal desta iniciativa é darlle unha nova vida a estes produtos, facilitando que poidan ser reutilizados por outras persoas e contribuíndo así á redución de residuos, ao aforro no consumo de auga e materias primas e á diminución da contaminación do entorno. Trátase, en definitiva, de fomentar un modelo de consumo máis consciente, colaborativo e respectuoso co medio natural.

Ademais, a celebración conxunta da Feira de Segunda Man e do Comercio Local pretende dinamizar a actividade económica do municipio nunha data sinalada como é San Lázaro, apoiando ao tecido comercial de proximidade e reforzando o carácter social e festivo da xornada.

As persoas interesadas en participar poderán formalizar a súa inscrición a través da sede electrónica do Concello de Pontecesures. Así mesmo, o formulario estará dispoñible para a súa descarga na páxina web municipal e poderá presentarse presencialmente nas oficinas do Concello. O prazo de inscrición permanecerá aberto dende o 16 de febreiro ata o 16 de marzo.

O Concello anima á veciñanza e ao público en xeral a participar nesta primeira edición, que nace coa vocación de consolidarse como un referente anual de sustentabilidade, convivencia e impulso ao comercio local.

Concello de Pontecesures

PD: Nos documentos adxuntos pódese consultar o regulamento de funcionameto desta feira, e tamén pode atopra a ficha de inscricion para participar nela.